ឧបនាយករដ្ឋមន្រ្តី ស សុខា អញ្ជើញបិទសន្និបាតបូកសរុប លទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់សមាគម IPA

(ភ្នំពេញ)៖ លោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅរសៀលថ្ងៃទី៣១ ខែមីនាឆ្នាំ២០២៤ បានអញ្ជើញជាអធិបតី ពិធីបិទសន្និបាតបូកសរុប លទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់សមាគមសម្ព័ន្ធសារព័ត៌មានឯករាជ្យ (IPA) ដែលធ្វើឡើងក្រោមប្រធានបទ «រួមគ្នាប្រើប្រាស់ប្រព័ន្ធផ្សព្វផ្សាយសង្គម ជាប្រយោជន៍ដល់ប្រជាជន និងសង្គមជាតិទាំងមូល»។

លោកអភិសន្តិបណ្ឌិត ស សុខា ក៏បានពិនិត្យ និងផ្តល់យោបល់លើរបៀបវារៈ ចំនួន៤ រួមមានទី១៖ ការពិនិត្យ និងអនុម័តរបាយការណ៍លទ្ធផលការងារឆ្នាំ២០២៣ ទី២៖ ការពិនិត្យ និងអនុម័តលើការធ្វើវិសោធនកម្មលក្ខន្តិកៈសមាគម ទី៣-ការពិនិត្យ និងអនុម័តលើការកែសម្រួលបទបញ្ជាផ្ទៃក្នុងសមាគម និងទី៤៖ការពិនិត្យ និងអនុម័តលើផែនការសកម្មភាពឆ្នាំ២០២៤ របស់សមាគម និងបានផ្ដល់ឱកាសជូនតំណាងសមាគមមកពីរាជធានី-ខេត្ត ឡើងធ្វើបទអន្តរាគមន៍ពាក់ព័ន្ធនឹងប្រធានបទ រួមគ្នាប្រើប្រាស់ប្រព័ន្ធផ្សព្វផ្សាយសង្គម ជាប្រយោជន៍ដល់ប្រជាជន និងសង្គមជាតិទាំងមូល។

ដោយផ្អែកលទ្ធផលសម្រេចបានក្នុងឆ្នាំ២០២៣៖ ប្រតិបត្តិតាមអនុសាសន៍ណែនាំដ៏ខ្ពង់ខ្ពស់របស់ លោកអភិសន្តិបណ្ឌិត ប្រធានកិត្តិយសសមាគមសម្ព័ន្ធសារព័ត៌មានឯករាជ្យ សមាគមបានកសាងកម្លាំងជាសមាជិកបានចំនួន៥ ០៨៤រូប អង្គភាពសារព័ត៌មានចំនួន៧៤អង្គភាព អង្គការសមាគមចំនួន២៣ស្ថាប័ន ក្រុមហ៊ុន សហគ្រាស គ្រឹះស្ថានសិក្សាចំនួន ២៤ស្ថាប័ន ចូលរួមធ្វើសកម្មភាពសង្គម មនុស្សធម៌ សាសនា ក្រោមការឧបត្ថម្ភរបស់ លោកអភិសន្តិបណ្ឌិត និងលោកស្រី ចំនួន៤២៧លើក បើកវគ្គបណ្តុះបណ្តាលខ្លីចំនួន២វគ្គ ដោយមានសិក្ខាកាមចូលរួមចំនួន៩៥០អង្គ/នាក់ ផ្តល់អាហារូបករណ៍ដល់សមាជិក សមាជិកា តាមរយៈគ្រឹះស្ថានសិក្សាដៃគូចំនួន៩៥នាក់ បើកវគ្គបណ្តុះបណ្តាលផ្ទៃក្នុងចំនួន៦វគ្គ ដាក់ភ្នាក់ងារសង្កេតការណ៍បោះឆ្នោតជ្រើសតាំងតំណាងរាស្ត្រ នីតិកាលទី៧

 នៅខេត្តព្រៃវែង ស្វាយរៀង និងខេត្តបន្ទាយមានជ័យ ចូលរួមប្រជុំនិងផ្តល់យោបល់ផ្នែកអង្គការសង្គមស៊ីវិលជាមួយ គ.ជ.ប. ចំនួន១៣លើក ចេញផ្សាយព័ត៌មានអំពីសកម្មភាព និងសមិទ្ធផលនានារាជរដ្ឋាភិបាល ក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ផ្សព្វផ្សាយនិងជំរុញការអនុវត្ត គោលនយោបាយភូមិ-ឃុំ-សង្កាត់មានសុវត្ថិភាព ចំនួន៥២ ៦៧៥ព័ត៌មាន ចេញផ្សាយព័ត៌មានអំពី ឯកឧត្តមអភិសន្តិបណ្ឌិត និងក្រសួងមហាផ្ទៃ ចំនួន២ ៦៧៩ព័ត៌មាន ផលិតវីដេអូ និងរឿងអប់រំខ្លីស្តីពីចរាចរណ៍ និងគ្រឿងញៀនចំនួន១២ឃ្លីប និងរៀបចំកាតសម្គាល់ខ្លួនសមាជិក សមាជិកា ជំហានទី១ ចំនួន ៥០០កាត។

សម្រាប់ទិសដៅការងារបន្តឆ្នាំ២០២៤៖ អង្គសន្និបាតបានអនុម័ត នូវទិសដៅការងារសំខាន់ ដូចជា កៀរគរបង្កើនចំនួនសមាជិកប្រកបដោយគុណភាព រៀបចំកម្មវិធីប្រកួត ឬប្រឡងប្រណាំងពានរង្វាន់ ឯកឧត្តមអភិសន្តិបណ្ឌិត និងលោកជំទាវ ជាពិសេសកម្មវិធីប្រកួត ស្នាដៃពិសិដ្ឋអ្នកផលិតព័ត៌មាន បង្កើតដៃគូសហការជាមួយអង្គភាពសារព័ត៌មានបរទេស អង្គការនិងសមាគមក្រៅរដ្ឋាភិបាលក្រុមហ៊ុន សហគ្រាស គ្រឹះស្ថានសិក្សា មន្ទីរពេទ្យ សហព័ន្ធ ក្លិប ចូលរួមការងារមនុស្សធម៌ សាសនា អប់រំ កីឡា សិល្បៈ វប្បធម៌ ចរាចរណ៍ គ្រឿងញៀន ពង្រឹងគុណភាព នៃការផ្សព្វផ្សាយ ក្រមសីលធម៌វិជ្ជាជីវៈសារព័ត៌មាន និងច្បាប់ស្តីពីរបបសារព័ត៌មាននៅកម្ពុជា ចូលរួមពង្រឹងការផ្សព្វផ្សាយព័ត៌មានពិត

 និងលុបបំបាត់ព័ត៌មានក្លែងក្លាយនៅកម្ពុជា បើកវគ្គបណ្តុះបណ្តាលជំនាញសារព័ត៌មាន ជំនាញអភិវឌ្ឍន៍ធនធានមនុស្ស ជំនាញកសិកម្ម ច្បាប់ ជំនាញបច្ចេកវិទ្យាឌីជីថល ជំនាញរឹង និងជំនាញទន់ នៅរាជធានីភ្នំពេញ និងតាមបណ្តាខេត្ត កម្មវិធីបរិច្ចាគឈាម ដាំដើមឈើ សម្អាតបរិស្ថាន ផលិតវីដេអូ និងរឿងអប់រំខ្លី ពាក់ព័ន្ធចរាចរណ៍ គ្រឿងញៀន គ្រឿងស្រវឹង និងសីលធម៌សង្គម។

បន្ថែមពីនេះ ស្របតាមអនុសាសន៍តម្រង់ទិសដ៏ខ្ពង់ខ្ពស់របស់ លោកអភិសន្តិបណ្ឌិត បានឯកភាពខ្ពស់ចំពោះការប្ដេជ្ញាចិត្ត និងទិសដៅការងារបន្តរបស់ សមាគមសម្ព័ន្ធសារព័ត៌មានឯករាជ្យ ដោយបានជំរុញលើកទឹកចិត្ត សមាជិក សមាជិកា សមាគម បន្តរួមគ្នា ការពារសន្តិភាព ដែលជាមរតកដ៏ពិសិដ្ឋខ្ពង់ខ្ពស់ របស់ សម្ដេចតេជោ ហ៊ុន សែន អតីតនាយករដ្ឋមន្រ្តី ពង្រឹងសាមគ្គីភាពនិងទំនាក់ទំនងល្អ បង្កើនការបណ្ដុះបណ្ដាលជំនាញផ្សព្វផ្សាយព័ត៌មាន រួមបញ្ចូលប្រព័ន្ធឌីជីថល បង្កើនការផ្សព្វផ្សាយសកម្មភាពនិងសមិទ្ធផលនានារារបស់ជរដ្ឋាភិបាល ព្រមទាំងរដ្ឋបាលថ្នាក់ក្រោមជាតិ ជាពិសេស គោលនយោបាយភូមិ-ឃុំ-សង្កាត់មានសុវត្ថិភាព បង្កើនកិច្ចសហប្រតិបត្តិការល្អជាមួយក្រសួងព័ត៌មាន ប្រព័ន្ធផ្សព្វផ្សាយក្នុងនិងក្រៅប្រទេស បង្កើនការផលិតវីដេអូអប់រំ បន្តសកម្មភាពសង្គមកិច្ច ពង្រឹងកិច្ចសហការជាមួយអាជ្ញាធរថ្នាក់ក្រោមជាតិ និងពង្រឹងរចនាសម្ព័ន្ធសមាគមទាំងថ្នាក់ជាតិ និងថ្នាក់ក្រោមជាតិឱ្យបានល្អប្រសើរ៕

(សូមអានបន្ត)

ស្ពានអាកាស «មរតកតេជោ» បានបើកឲ្យប្រើប្រាស់បណ្តោះអាសន្ននៅព្រឹកនេះ

ស្ពានអាកាស«មរតកតេជោ» ដែលជាហេដ្ឋារចនាសម្ព័ន្ធថ្មីមួយបន្ថែមទៀត បានបើកឲ្យ​ប្រើប្រាស់​ជាបណ្តោះអាសន្នហើយនៅព្រឹកថ្ងៃទី១ ខែមេសា ឆ្នាំ២០២៤នេះ។ ស្ពានអាកាសនេះ មានទីតាំងស្ថិតនៅចំណុចប្រសព្វរវាងមហាវិថីសម្តេចតេជោ ហ៊ុន សែន មហាវិថី ព្រះមុនីវង្ស និងមហាវិថីយោធពលខេមរភូមិន្ទ (ផ្លូវ២៧១) ស្ថិត ក្នុង មូលដ្ឋាន ខណ្ឌ មានជ័យ និងខណ្ឌចំការមន រាជធានីភ្នំពេញ ដែលសាងសង់ដោយ​ក្រុមវិស្វករខ្មែរ​នៃ​ក្រុមហ៊ុន​វិនិយោគ​ទុន​អាណិកជនកម្ពុជា (OCIC) ដោយក្នុងនោះ ស្ពានអាកាសជាន់ទី២ ដែល​តភ្ជាប់​ពី​មហា​វិថី​សម្តេចតេជោ ហ៊ុន សែន មកមហាវិថីព្រះមុនីវង្ស បានបើក​ឱ្យប្រើប្រាស់​ជា​ប​ណ្ដោះ​អា​សន្ន នៅថ្ងៃ ដើម្បីរួមចំណែកកាត់បន្ថយការកកស្ទះចរាចរណ៍ និង​បង្ក​លក្ខណៈ​ងាយ​ស្រួល​ក្នុង​ការ​ធ្វើ​ដំណើររបស់ប្រជាពលរដ្ឋ នៅ​មុនពេលបុណ្យចូលឆ្នាំថ្មីប្រពៃណីជាតិ។

(សូមអានបន្ត)

នាយឧត្តមសេនីយ៍ សៅ សុខា បញ្ជាឲ្យស្រាវជ្រាវវែកមុខមេក្លោង ​មេខ្យល់ ដែលបំផុសឲ្យពលរដ្ឋកាប់ទន្ទ្រានយកដីរដ្ឋនៅខេត្តមណ្ឌលគិរី

(មណ្ឌលគិរី)៖ នាយឧត្តមសេនីយ៍ សៅ សុខា អគ្គមេបញ្ជាការរង មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានដាក់បទបញ្ជាយ៉ាងម៉ឺងម៉ាត់ឲ្យកម្លាំងជំនាញគ្រប់ស្ថាប័នពាក់ព័ន្ធទាំងអស់ ត្រូវស្រាវជ្រាវវែកមុខរកមេក្លោង មេខ្យល់ ដែលបំផុសញុះញង់ឲ្យប្រជាពលរដ្ឋទៅកាន់ទន្ទ្រានយកដីរដ្ឋធ្វើជាកម្មសិទ្ធិដោយខុសច្បាប់ នៅខេត្តមណ្ឌលគិរី។

(សូមអានបន្ត)

រដ្ឋមន្ត្រី​ ប៉េង​ ពោធិ៍នា​ ដឹកនាំកិច្ចប្រជុំប្រចាំខែ របស់ថ្នាក់ដឹកនាំក្រសួងសាធារណការ​ និងដឹកជញ្ជូន

(ភ្នំពេញ)៖​ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នាព្រឹកថ្ងៃទី២៩ ខែមីនា ឆ្នាំ២០២៤នេះ​ បានអញ្ជើញដឹកនាំកិច្ចប្រជុំប្រចាំខែ របស់ថ្នាក់ដឹកនាំក្រសួង ដោយមានការចូលពីលោក​ លោកស្រី​ ជាថ្នាក់ដឹកនាំ និងមន្ត្រីពាក់ព័ន្ធក្រោមឱវាទក្រសួង ជាច្រើនរូបផ្សេងទៀត។

(សូមអានបន្ត)

រដ្ឋបាលរាជធានីភ្នំពេញ ប្រកាសហាមឃាត់ការលេងល្បែងជះទឹក លាបធ្យូង ឬប៉ាតម្សៅ និងការវាយដោយរំពាត់ អុជផាវ ឬឧបករណ៍ផ្សេងៗ ក្នុង​ឱកាស​បុណ្យចូលឆ្នាំ​ខ្មែរ​​

(ភ្នំពេញ)៖ ដើម្បីរក្សាបាននូវសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ក្នុងរាជធានីភ្នំពេញ ក៏ដូចជារក្សាបាននូវប្រពៃណីជាតិ និងសេចក្ដីថ្លៃថ្នូរដ៏ផូរផង់របស់ជាតិយើង រដ្ឋបាលរាជធានីភ្នំពេញ បានប្រកាសហាមឃាត់ការលេងល្បែងស៊ីសងខុសច្បាប់គ្រប់ប្រភេទ និងការលេងល្បែងជះទឹក ការជះទឹកមានពណ៌ ឬទឹកកខ្វក់ គប់ស្បោងទឹក លាបធ្យូង ឬប៉ាតម្សៅ និងការវាយដោយរំពាត់ ឬឧបករណ៍ផ្សេងៗ ក្នុង​ឱកាស​បុណ្យចូលឆ្នាំ​ខ្មែរ​​។

បើតាមសេចក្តីជូនដំណឹងរបស់រដ្ឋបាលរាជធានីភ្នំពេញ ដែលបណ្តាញព័ត៌មាន Fresh News ទទួលបាននៅល្ងាចថ្ងៃទី២៨ ខែមីនា ឆ្នាំ២០២៤នេះ រដ្ឋបាលរាជធានីភ្នំពេញ បានអំពាវនាវដល់ប្រជាពលរដ្ឋ ជាពិសេសក្មួយៗ ជាយុវជនយុវនារី សិស្ស និស្សិត និងកម្មករ កម្មការិនីទាំងអស់ដូចជា៖

ទី១៖ ត្រូវគោរពច្បាប់ចរាចរណ៍ផ្លូវគោក និងមិនត្រូវបើកបរក្នុងស្ថានភាពស្រវឹង ដើម្បីចៀសវាងគ្រោះថ្នាក់ផ្សេងៗ។

ទី២៖ ហាមដាច់ខាតការលេងល្បែងស៊ីសងខុសច្បាប់គ្រប់ប្រភេទ។

ទី៣៖ ហាមឃាត់ការលេងល្បែងជះទឹក ការជះទឹកមានពណ៌ ឬទឹកកខ្វក់ គប់ស្បោងទឹក លាបធ្យូង ឬប៉ាតម្សៅ និងការវាយដោយរំពាត់ ឬឧបករណ៍ផ្សេងៗចំពោះបងប្អូនប្រជាពលរដ្ឋដែលកំពុងធ្វើដំណើរតាមយានយន្ត ព្រោះអាចនាំឱ្យមានគ្រោះថ្នាក់ចរាចរណ៍ប៉ះពាល់ដល់អាយុជីវិត បង្ករបួសស្នាម ឬខូចខាតទ្រព្យសម្បត្តិ។ល។

ទី៤៖ ហាមឃាត់ការនាំចូល ចែកចាយ ទិញលក់ និងអុជផាវ ព្រមទាំងគ្រឿងផ្ទុះគ្រប់ប្រភេទដែលអាចបង្កឱ្យ មានការភ្ញាក់ផ្អើល បង្កអសន្តិសុខ និងប៉ះពាល់សណ្ដាប់ធ្នាប់ ព្រមទាំងសុវត្ថិភាពបងប្អូនប្រជាពលរដ្ឋ និងអ្នកដំណើរ។

ទី៥៖ ចូលរួមទប់ស្កាត់គ្រោះអគ្គិភ័យ ដោយប្រុងប្រយ័ត្ន និងម្ចាស់ការខ្ពស់ចំពោះភ្លើងទៀន ធូប ភ្លើងចង្ក្រាន ចរន្តអគ្គិសនី ដើម្បីរក្សាបាននូវទ្រព្យសម្បត្តិ អាយុជីវិតផ្ទាល់ខ្លួន និងអ្នកដទៃ។

ទី៦៖ លើកទឹកចិត្តដល់បងប្អូនប្រជាពលរដ្ឋ និងយុវជន យុវនារី ចូលរួមលេងល្បែងប្រជាប្រិយខ្មែរឱ្យបាន ច្រើនកុះករ៕

ខាងក្រោមនេះជាសេចក្តីជូនដំណឹងរបស់រដ្ឋបាលរាជធានីភ្នំពេញ៖

(សូមអានបន្ត)

អង្គសន្និបាតក្រសួងការបរទេស វាយតម្លៃខ្ពស់ចំពោះសមិទ្ធផលសំខាន់ៗ ដែលក្រសួងសម្រេចបានក្នុងឆ្នាំ២០២៣ លើសមរភូមិការទូត ដោយផ្តោតជាចម្បង លើការងារធំៗចំនួន៥

ក្រសួងការបរទេស និងសហប្រតិបត្តិការអន្តរជាតិ បានរៀបចំពិធីបើកសន្និបាតបូកសរុប លទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ នៅថ្ងៃទី២៨ ខែមីនា ឆ្នាំ២០២៤ ក្រោមអធិបតីភាព ឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និង សហប្រតិបត្តិការអន្តរជាតិ ដោយមានការចូលរួមពីថ្នាក់ដឹកនាំ មន្ត្រីរាជការក្រសួង ប្រធានស្ថាន តំណាងកម្ពុជានៅបរទេស និងតំណាងស្ថាប័នជាតិនានាជាភ្ញៀវកិត្តិយស។

អង្គសន្និបាត បានធ្វើការកត់សម្គាល់ដោយវាយតម្លៃខ្ពស់ចំពោះសមិទ្ធផលសំខាន់ៗ ដែលក្រសួងសម្រេចបានក្នុងឆ្នាំ២០២៣ លើសមរភូមិការទូត ដោយផ្តោតជាចម្បង លើការងារធំៗចំនួន ៥៖

ការងារទី១ គឺការការពារផលប្រយោជន៍ជាតិ ការពារឯករាជ្យ អធិបតេយ្យ បូរណភាពទឹកដី ដោយក្រសួង បានចូលរួមសហការជាមួយក្រសួង/ស្ថាប័នពាក់ព័ន្ធ ទទួលបានជោគជ័យក្នុងការនាំកម្ពុជាចេញពីបញ្ជីប្រផេះរបស់ក្រុមការងារហិរញ្ញវត្ថុ (FATF) ដែលនេះជាការចូលរួមចំណែកដ៏ធំធេង ក្នុងការលើកកម្ពស់ទំនុកចិត្តវិនិយោគនៅកម្ពុជា។

ចំពោះការជួយសង្គ្រោះពលរដ្ឋខ្មែរនៅបរទេស ដោយមានការសហការជិតស្និទ្ធជាមួយក្រសួងមហាផ្ទៃ ក្រសួងបានផ្តល់ការគាំទ្រ ជួយសង្គ្រោះ និងសម្របសម្រួលមាតុភូមិនិវត្តន៍ដល់ ពលរដ្ឋខ្មែរដែលរងគ្រោះដោយការរំលោភសិទ្ធិសេរីភាពនៅបរទេស និងអំពើជួញដូរមនុស្សចំនួន ៧.៩៥៣នាក់ ពីប្រទេសថៃ ឡាវ វៀតណាម ម៉ាឡេស៊ី ចិន ឥណ្ឌូណេស៊ី មីយ៉ាន់ម៉ា និងសិង្ហបុរី។

ការងារទី២ គឺការអនុវត្តគោលនយោបាយការបរទេសប្រកបដោយភាពបត់បែនវាងវៃ តបទៅនឹងសម្ពាធភូមិសាស្ត្រនយោបាយ មានជាអាទិ៍ កម្ពុជាបានសម្រេចដាក់បេក្ខភាពជាអ្នកសង្កេតការណ៍ក្នុងអង្គការសហប្រតិបត្តិការឥស្លាម និងអង្គការសហប្រតិបត្តិការសៀងហៃ ព្រមទាំងបានសម្រេចដាក់បេក្ខភាពធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីឆ្នាំ២០២៦ ផងដែរ។

ការងារទី៣ គឺការចូលរួមក្នុងបុព្វហេតុសន្តិភាព ស្ថិរភាព និងដំណោះស្រាយបញ្ហាប្រឈមនានានៅក្នុងពិភពលោក មានជាអាទិ៍ កម្ពុជាបានវិវត្តពីប្រទេសដែលលិចលង់ក្នុងភ្នក់ភ្លើងសង្គ្រាម ទៅជាតួអង្គសំខាន់ក្នុងបុព្វហេតុសន្តិភាពពិភពលោក ក្រោមឆ័ត្រអង្គការសហប្រជាជាតិ ដោយចាប់ពីឆ្នាំ២០០៦ ដល់ឆ្នាំ២០២៣ កម្ពុជាបានបញ្ជូនកងកម្លាំងរក្សាសន្តិភាពចំនួន៩.២៨១នាក់ ទៅបំពេញបេសកកម្មនៅប្រទេសចំនួន១០ ដែលធ្វើឱ្យកម្ពុជាជាប់ចំណាត់ថ្នាក់ទី២៨ នៅលើ ពិភពលោក និងទី៣ ក្នុងតំបន់អាស៊ាន ក្នុងការចូលរួមបំពេញបេសកកម្មដ៏ឧត្ដុង្គឧត្តមនេះ។

ការងារទី៤ គឺការអនុវត្តការងារការទូតសេដ្ឋកិច្ច វប្បធម៌ និងទេសចរណ៍ ដើម្បីលើកស្ទួយ សេដ្ឋកិច្ច និងកិត្យានុភាពជាតិ។ ជាក់ស្តែងសៀវភៅកេរដំណែលម្ហូបខ្មែរ - The Taste of Angkor ដែលបានបោះពុម្ពផ្សាយដោយក្រសួងការបរទេស និងសហប្រតិបត្តិការអន្តរជាតិ បានឈ្នះពានរង្វាន់ Best Television Awards in the World ដែលជាពានរង្វាន់ទី៤ បន្ទាប់ពីការឈ្នះពានរង្វាន់ Best Asian Cookbook និង Best Heads of State/Food កាលពីឆ្នាំ២០២១ និង២០២២។

និងការងារទី៥ គឺការបន្តការដ្ឋានកំណែទម្រង់ស្ថាប័ននៅក្នុងក្រសួង ដោយក្រសួងបានពង្រឹង កិច្ចខិតខំប្រឹងប្រែងជាបន្តបន្ទាប់ក្នុងការគ្រប់គ្រង ធនធានមនុស្ស ការសម្រួលការិយាធិបតេយ្យ និងនិតិវិធីរដ្ឋបាល ក៏ដូចជាការគ្រប់គ្រងហិរញ្ញវត្ថុឱ្យកាន់តែមានប្រសិទ្ធភាពដែលការណ៍នេះដើរតួនាទីដ៏ចាំបាច់ក្នុងការលើកកម្ពស់ផលប្រយោជន៍ជាតិ និងកិត្យានុភាពជាតិ។

ក្នុងពិធីនោះ ឯកឧត្ដមឧបនាយករដ្ឋមន្ត្រី បានកោតសរសើរចំពោះការឆ្លើយតប បានទាន់ពេលវេលា និងមានប្រសិទ្ធភាពរបស់អ្នកការទូត និងមន្ត្រីរាជការរបស់ក្រសួង ដែលមានមនសិការស្នេហាជាតិយ៉ាងស្មោះស្ម័គ្រ ខិតខំបំពេញការងារជូនជាតិមាតុភូមិ ហើយតែងតែយកចិត្តទុកដាក់តម្កល់ផលប្រយោជន៍ជាតិជាធំ ការពារអធិបតេយ្យជាតិ និងបូរណភាពទឹកដី ធានាដល់សុខសន្តិភាព ស្ថិរភាព និងការអភិវឌ្ឍសេដ្ឋកិច្ច-សង្គម ដោយមិនខ្លាចភាពនឿយហត់។ 

(សូមអានបន្ត)

សម្ដេចតេជោ ហ៊ុន សែន អញ្ជើញធ្វើទស្សនៈកិច្ចទៅកាន់ទីក្រុងអវកាសអន្តរជាតិ ក្នុងខេត្តហៃណាន សាធារណរដ្ឋប្រជាមានិតចិន

នៅរសៀល ថ្ងៃពុធ ៣រោច ខែផល្គុន ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី២៧ ខែមីនា ឆ្នាំ២០២៤ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងគណៈប្រតិភូអញ្ជើញបន្តធ្វើទស្សនកិច្ចទៅកាន់ ទីក្រុងអវកាសអន្តរជាតិ (Wenchang International Aerospace City ) មានទីតាំងនៅទីក្រុង Wenchang ខេត្ត Hainan សាធារណរដ្ឋប្រជាមានិតចិន។

វត្តមាននៃការអញ្ជើញដល់របស់សម្តចតេជោ និងគណៈប្រតិភូជាន់ខ្ពស់ ត្រូវបានការធ្វើគារវកិច្ចស្វាគមន៍យ៉ាងកក់ក្តៅបំផុត ពីថ្នាក់ដឹកនាំនៃទីក្រុងអវកាសអន្តរជាតិ (Wenchang International Aerospace City ។ សូមបញ្ជាក់ថា ទីក្រុងអវកាសអន្តរជាតិ (Wenchang Interna tional Aerospace City )មានទីតាំងនៅទីក្រុង Wenchang ខេត្តហៃណាន។ អវកាសអន្តរជាតិនេះ ជាមូលដ្ឋាន បាញ់បង្ហោះតាមឆ្នេរ សមុទ្រដំបូងគេបង្អស់របស់ប្រទេសចិន។ មជ្ឈមណ្ឌលនេះ គឺជាតំបន់ត្រួសត្រាយ ដ៏មានសារ សំខាន់នៃតំបន់ភាគខាងលិចនៃឆ្នេរសមុទ្រ Bamen និងតំបន់ឧស្សាហកម្មកុំព្យូទ័រទំនើប។

មជ្ឈមណ្ឌលនេះបំពាក់ទៅ ដោយគ្រឿងបរិក្ខារគាំទ្រដូចជា មជ្ឈមណ្ឌលតាំងពិព័រណ៍ អាផាតមិនដែលមានទេពកោសល្យ មជ្ឈមណ្ឌលសេវាកម្ម ឧស្សាហកម្ម កន្លែងហាត់ប្រាណ នឹងត្រូវបានសាងសង់ និងកែលម្អជាបណ្តើរៗ ទិសដៅអភិវឌ្ឍន៍ នៃទីក្រុង អាកាសយានិក គឺដើម្បីក្លាយជាមូលដ្ឋានឧស្សាហកម្មច្នៃប្រឌិតវិទ្យាសាស្ត្រ និងបច្ចេកវិទ្យាដ៏សំខាន់ នៅក្នុងវិស័យ អវកាស និងជាមូលដ្ឋានឧស្សាហកម្មយុទ្ធសាស្ត្រសម្រាប់ការច្នៃប្រឌិតបច្ចេកវិទ្យា ក្នុងលំហអាកាស និងជាមូលដ្ឋាន ឧស្សាហកម្មបង្ហាញសម្រាប់សមាហរណកម្ម និងការច្នៃប្រឌិត មូលដ្ឋានឧស្សាហកម្មសហប្រតិបត្តិការអន្តរជាតិ សម្រាប់លំហអាកាស និងមជ្ឈមណ្ឌលកុំព្យូទ័រទំនើបអវកាស។ នៅពេលអនាគត ទីក្រុងអវកាសនេះ នឹងផ្ដោតលើ ការអភិវឌ្ឍការបើកដំណើរការអវកាស និងឧស្សាហកម្មសេវាកម្មគាំទ្រ ផលិតផលអវកាសកម្រិតខ្ពស់ - R&D និង ឧស្សាហកម្មផលិត ព្រមទាំងបន្តជំរុញការអភិវឌ្ឍន៍ទិន្នន័យ និងកម្មវិធីធំៗលើលំហ ការអភិវឌ្ឍន៍រុំក្អែត ឧបករណ៍ ធ្វើតេស្តដី និងការធ្វើតេស្តការផ្គុំចុងក្រោយ វិទ្យាសាស្ត្រអវកាស។ និងការអប់រំបច្ចេកវិជ្ជា ទេសចរណ៍វប្បធម៌ ការអប់រំ និងបណ្តុះបណ្តាលកិច្ចសហប្រតិបត្តិការអន្តរជាតិលើលំហអាកាស។ល។

សហគ្រាសដែលចូលទៅក្នុងឧទ្យាននឹងរីក រាយ ជាមួយគោលនយោបាយអនុគ្រោះដ៏សម្បូរបែបដែលគ្របដណ្ដប់ពីសារពើពន្ធ ដើមទុន ហិរញ្ញវត្ថុ រហូតដល់ដីធ្លី សេវាសាធារណៈ និងយន្តការស្ថាប័ន ខេត្តហៃណាន នឹងរៀបចំមូលនិធិសាងសង់ពិសេសចំនួន ៥០០ លានយ័ន ជារៀងរាល់ឆ្នាំសម្រាប់រយៈពេល5ឆ្នាំជាប់ៗគ្នា ដើម្បីគាំទ្រដល់ការអភិវឌ្ឍន៍ទីក្រុងអវកាសនេះ។ នៅដំណាក់កាល បច្ចុប្បន្ន ការជំរុញការវិនិយោគរបស់ទីក្រុងអវកាស រួមមាន ការអភិវឌ្ឍន៍ផ្កាយរណប ការអភិវឌ្ឍក្កិត ការអភិវឌ្ឍន៍ ឧបករណ៍ក្នុងលំហអាកាស វិទ្យាសាស្ត្រអវកាស និងការរកឃើញ កម្មវិធីផ្កាយរណប ព័ត៌មានអេឡិចត្រូនិក ឧបករណ៍ កម្រិតខ្ពស់ សម្ភារៈថ្មី ថាមពលថ្មី កិច្ចសហប្រតិបត្តិការអន្តរជាតិ និងការផ្លាស់ប្តូរអវកាស ហិរញ្ញវត្ថុអវកាស។

សេវាកម្ម ការបណ្តុះបណ្តាល និងការអប់រំអវកាស ការច្នៃប្រឌិតអវកាស និងទិន្នន័យធំនៅក្នុងលំហអាកាស។ សម្ដេចតេជោ ហ៊ុន សែន បានថ្លែងអំណរគុណជូនចំពោះថ្នាក់ដឹកនាំ នៃបណ្ឌិតសភាវិទ្យាស្ថានកសិកម្មត្រូពិច និងទីក្រុងអវកាសអន្តរជាតិ (Wenchang International Aerospace City)មានទីតាំងនៅទីក្រុង Wenchang ខេត្ត Hainan ដែល បាន អនុញ្ញាតឲ្យរូបសម្តេច និងប្រតិភូជាន់ខ្ពស់ បានចូលទស្សនកិច្ចសិក្សាស្វែងយល់ ពីសក្តានុពលនិងភាពរីកចំរើនដ៏ អស្ចារ្យនៃផ្នែកកសិកម្ម និងទីក្រុងអវកាសរបស់ខេត្តហៃណាន់ សាធារណរដ្ឋប្រជាមានិតចិន៕

(សូមអានបន្ត)

អភិបាលខេត្តកំពត ណែនាំដល់មន្ទីរ-អង្គភាព ស្ថាប័នរដ្ឋ និងឯកជនចូលរួមតុបតែងលម្អទីតាំងខ្លួន ដើម្បីទាក់ទាញទេសចរក្នុងឱកាសបុណ្យចូលឆ្នាំថ្មីខាងមុខ

ថ្លែងនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តកំពត ដែលបានរៀបចំឡើងនៅសាលប្រជុំបូកគោ ខេត្តកំពត នាថ្ងៃទី២៧ ខែមីនា ឆ្នាំ២០២៤ ឯកឧត្តម ម៉ៅ ធនិន អភិបាលខេត្តបានលើកឡើងថា ខេត្តកំពតគឺជាខេត្តគោលដៅទេសចរណ៍ ដែលទទួលបានការគាំទ្រពីសំណាក់ភ្ញៀវទេសចរជាតិ និងអន្តរជាតិ ហើយរាល់ពេលមានព្រឹត្តិការណ៍បុណ្យជាតិធំៗ រដ្ឋបាលខេត្តតែងតែយកចិត្តទុកដាក់រៀបចំសណ្តាប់ធ្នាប់នៅតាមទីសាធារណៈផ្សេងៗ ការសម្រួលចរាចរណ៍មិនឱ្យមានការកកស្ទះ ពិសេសការតុបតែងលម្អភ្លើងពណ៌តាមសួនច្បារ និងដងផ្លូវសំខាន់ៗក្នុងក្រុង ធ្វើឱ្យខេត្តទទួលបានភ្ញៀវទេចរមកសម្រាកកម្សាន្តច្រើន។

ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលឈានចូលមកដល់នាពេលខាងមុខ ដើម្បីឱ្យរក្សាបាននូវកំណើនភ្ញៀវទេសចរ ឯកឧត្តមអភិបាលខេត្តបានណែនាដល់ មន្ទីរ-អង្គភាព ស្ថាប័នរដ្ឋ និងឯកជននៅក្នុងខេត្ត ចូលរួមតុបតែងលម្អសោភ័ណភាពនៅតាមទីតាំងរបស់ខ្លួនបន្ថែមទៀត មានដូចជាការសម្អាតអនាម័យបរិស្ថាន ការទុកដាក់សំរាម ការបំពាក់ភ្លើងលម្អបន្លែម ដើម្បីឱ្យក្រុង-ស្រុកទាំងអស់ក្នុងខេត្ត មានភាពទាកទាញភ្ញៀវទេសចរមកលេងកម្សាន្ត។

ឯកឧត្តមអភិបាលខេត្ត ក៏បានណែនាំអោយអាជ្ញាធរក្រុង-ស្រុកទាំង៩ បង្កើនការយកចិត្តទុកដាក់ រឹតបន្តឹងការការពារសន្តិសុខ សណ្តាប់ធ្នាប់សារធារណៈឱ្យបានល្អ ហើយអាជ្ញាធរក្រុង-ស្រុក ត្រូវចេះកែច្នៃតំបន់សក្តានុពលនៅក្នុងមូលដ្ឋានរបស់ខ្លួនបម្រើឱ្យវិស័យទេសចរណ៍។

ដោយឡែកក្រុងកំពត ដែលជាបេះដូងរបស់ខេត្ត អាជ្ញាធរខេត្តបាននិងកំពុងរៀបចំកែលម្អហេដ្ឋារចនាសម្ព័ន្ធផ្សេងៗជាច្រើន ដូចជាការពង្រីកផ្លូវ និងសួនច្បារកម្សាន្តមាត់ព្រែក(សួនត្រីផ្សោត) រូបសំណាកសេះសមុទ្របាញ់ទឹកមុខសាលាខេត្តចាស់ ឆ្នេរចន្លោះស្ពានចាស់ និងស្ពានថ្មី ឆ្នេរខ្សាច់ចំណតទូកទេសចរណ៍ចន្លោះស្ពានថ្មី និងស្ពានរថភ្លើង ការបំពាក់ភ្លើងពណ៌តាមដើមឈើ ស្ពាន តាមខឿនមាត់ព្រែក សួនច្បារ និងរមណីយដ្ឋានស្រះឈូកជាដើម៕ អត្ថបទ និងរូបភាព៖ មន្ទីរព័ត៌មានខេត្តកំពត

(សូមអានបន្ត)

ក្រសួងការបរទេសកម្ពុជានឹងបន្តប្រើប្រាស់យុទ្ធសាស្រ្តការទូតសេដ្ឋកិច្ចជំរុញសេដ្ឋកិច្ចជាតិទៅក្នុងតំបន់ និងអន្តរជាតិ

មន្រ្តីជាន់ខ្ពស់ក្រសួងការបរទេស និងសហប្រតិបត្តិការអន្តរជាតិ បញ្ជាក់ថា រាជរដ្ឋាភិបាល​នឹងបន្ត​ប្រើប្រាស់​យុទ្ធសាស្រ្តការទូតសេដ្ឋកិច្ចជំរុញសេដ្ឋកិច្ចជាតិទៅក្នុងតំបន់ និងអន្តរជាតិ។

ថ្លែងក្នុងឱកាសអញ្ជើញបើកកិច្ចប្រជុំបូកសរុបសមិទ្ធផលការងាររយៈពេល៣ឆ្នាំ នៃ​ការ​អនុវត្ត​យុទ្ធសាស្រ្ត​ការទូតសេដ្ឋកិច្ច និងប្រមូលធាតុចូលសម្រាប់រៀបចំយុទ្ធសាស្រ្តការទូតសេដ្ឋកិច្ច ឆ្នាំ​២០២៤-២០២៨ នៅថ្ងៃទី២៧ ខែមីនា ឆ្នាំ២០២៤ ឯកឧត្តម ឈីវ យីស៊ាង រដ្ឋលេខាធិការ​ក្រសួង​ការបរទេស និងសហប្រតិបត្តិការអន្តរជាតិ មានប្រសាសន៍ថា យុទ្ធសាស្ត្រការទូត​សេដ្ឋកិច្ច​កម្ពុជា​ត្រូវ​បានដាក់ឲ្យអនុវត្តក្នុងពេលដែលដឹកនាំដោយ ឯកឧត្តម ឧបនាយករដ្ឋមន្ត្រីប្រាក់ សុខុន អតីត​រដ្ឋមន្ត្រីក្រសួងការបរទេសនៅសហប្រតិបត្តិការអន្តរជាតិកាលពីឆ្នាំ២០២១។

ឯកឧត្តមបន្តថា ក្នុងនោះវិស័យការទូតសេដ្ឋកិច្ចត្រូវ​បានចាត់ទុក​គឺ​ជា​យុទ្ធសាស្ត្រ​ដ៏មា​ន​សារៈ​សំខាន់​មួយ ហើយយុទ្ធសាស្ត្រនេះទទួលទទួលបានការគាំទ្រពីសម្ដេចតេជោ ហ៊ុន សែន អតីត​នាយករដ្ឋ​មន្ត្រី​ដោយគ្រានោះការរៀបចំយុទ្ធសាស្ត្រនេះស្របពេលសកលលោក និងកម្ពុជា​ផងដែ​រ​កំ​ពុងប្រឈមដោយសារវិបត្តិជាសកលនៃជំងឺកូវីដ-១៩។

ឯកឧត្តមមានប្រសាសន៍ថា ក្រោមគំនិតដ៏ឈ្លាសវៃរបស់សម្ដេចតេជោ ហ៊ុន សែន អតីត​នាយករដ្ឋ​មន្ត្រី បានប្រែក្លាយការប្រឈមស្ថានភាពនេះទៅជាឱកាសសម្រាប់កម្ពុជា ដើម្បី​ចាប់​យក​ការ​ពង្រឹង​យុទ្ធសាស្រ្តការទូតសេដ្ឋកិច្ច ក្នុងការជំរុញសេដ្ឋកិច្ច សង្គម វប្បធម៌របស់កម្ពុជា។ ជាក់ស្តែង ឯកឧត្តម បានកោតសរសើរ និងវាយតម្លៃខ្ពស់ក្រុមការងារសម្របសម្រួលការងារការទូតសេដ្ឋកិច្ច ដែល​បានខិតខំប្រឹងប្រែងអនុវត្តការទូតសេដ្ឋកិច្ចរយៈពេលបីឆ្នាំកន្លងមក ពីឆ្នាំ២០២១ ដល់​២០២៣ រហូតសម្រេចបានលទ្ធផលជាផ្លែផ្កាគួរជាទីមោទនៈ។

នាឱកាសនោះ ឯកឧត្តម រដ្ឋលេខាធិការ ថ្លែងថា ក្នុងរយៈកាល៣ឆ្នាំនៃការអនុវត្តយុទ្ធសាស្ត្រនេះ ក្នុង​នាមសេនាធិការ ដែលសហការជាមួយក្រសួងពាក់ព័ន្ធបានខិតខំធ្វើការយ៉ាងសកម្ម ក្នុង​គោលដៅ​៖ ទី១) ជំរុញពាណិជ្ជកម្មអន្តរជាតិ តាមរយៈ ការរៀបចំ និងចូលរួម​ពិព័រណ៍​ជំរុញ​ការ​នាំ​ចេញ​ផលិត​ផលខ្មែរ និងពង្រីកទីផ្សារជាមួយប្រទេសជាដៃគូសំខាន់ៗ, ទី២) ទាក់ទាញ​វិនិយោគិន​បរទេស ដោយសហការជាមួយក្រុមប្រឹក្សាអភិវឌ្ឍន៍កម្ពុជា ដើម្បីផ្សព្វផ្សាយពីច្បាប់ វិនិយោគ ការលើកទឹកចិត្តពិសេស ក្នុងវិស័យអាទិភាព និងស្ថានភាពអំណោយផល សម្រាប់​វិនិយោគិន​នៅ​កម្ពុជា និងទី៣) ផ្សព្វផ្សាយពីវប្បធម៌ អរិយធម៌ខ្មែរ ពិសេសម្ហូបខ្មែរ លើឆាក​អន្តរជាតិ ដោយបានការចងក្រងសៀវភៅ មុខម្ហូប - កេរដំណែលស្នាដៃម្ហូបខ្មែរ» រហូត​ទទួល​បាន​រង្វាន់​អន្តរជាតិចំនួន ៤ និង បានរៀបចំទស្សនកិច្ចសិក្សាជូនអង្គទូតប្រចាំកម្ពុជា ដែល​មាន​និវេសដ្ឋាន​នៅ​ប្រទេសជិតខាងកម្ពុជា រួមទាំងទស្សនកិច្ច-ធុរកិច្ចនានា ដោយក្នុង​នោះ​ក៏​មាន​ជា​ការ​រៀបចំ​ទទួល​អាហារពេលល្ងាចជាលក្ខណៈម្ហូបខ្មែរ និងកម្មវិធី​ដំណើរ​កម្សាន្ត​ទៅ​តាម​រមណីយ​ដ្ឋាន​ប្រាសាទ​បុរាណ​ជាដើម។

ឯកឧត្តម បញ្ជាក់ថា ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី រាជរដ្ឋាភិបាលកម្ពុជាបានចាត់ទុក “ការទូតសេដ្ឋកិច្ច» ជា​វិស័យ​អាទិភាព​មួយ ដើម្បីពង្រឹងចំណងមិត្តភាពជាមួយ មិត្តចាស់ ពង្រីក​កិច្ច​សហ​ប្រតិបត្តិការ​ជាមួយ​ដៃ​គូ​សក្តានុពល និងលើកកម្ពស់កិត្យានុភាពជាតិលើឆាកអន្តរជាតិ ក្នុងន័យ​ជំរុញ​កំណើន​សេដ្ឋកិច្ច​ជាតិ និងធ្វើសមាហរណកម្មទៅក្នុងតំបន់ និងអន្តរជាតិ។

សូមជម្រាបថា យុទ្ធសាស្ត្រការទូតសេដ្ឋកិច្ច រៀបចំឡើងក្នុងគោលបំណង ផ្សារភ្ជាប់​គោល​នយោបាយ​ការ​បរទេស និងការអភិវឌ្ឍសេដ្ឋកិច្ចជាតិ ដោយប្រើប្រាស់មធ្យោបាយការទូត ក្នុង​ការ​ចូល​រួម​លើក​កម្ពស់ពាណិជ្ជកម្មអន្តរជាតិ, ទាក់ទាញការវិនិយោគផ្ទាល់ពីបរទេស, លើកកម្ពស់​វិស័យ​ទេសចរណ៍ និងជំរុញការផ្លាស់ប្តូរវប្បធម៌ និងកីឡា ដើម្បីចូលរួម​ពង្រឹង​ចន្ទល់​កំណើន​សេដ្ឋកិច្ច, កាត់បន្ថយការពឹងផ្អែកលើជំនួយពីខាងក្រៅ និងលើក​កម្ពស់​ផល​ប្រយោជន៍​កម្ពុជា​នៅ​ក្នុង​តំបន់ និងអន្តរជាតិ៕

(សូមអានបន្ត)